- 12 kilometroko mendi martxa 9:00etan hasiko da, eta familientzat, bizilagunentzat eta adin eta erritmo guztietako pertsonentzat irekia izango da. Ekimenak Batala Mendi Lasterketarekin lotutako ibilbidearen zati bat ezagutzeko aukera emango du, eta bizikidetza, lankidetza, inklusioa eta naturarekiko errespetua balioan jarriko ditu, euskara elkargune gisa hartuta.
- Ekainaren 27ko Batala Mendi Lasterketan izena emateko epeak zabalik jarraitzen du hiru modalitateetan: 30 km, 12 km esprint edo 12 km martxa.
Igande honetan, maiatzaren 24an, Lazkaok 12 kilometroko mendi-martxa hartuko du Batala proiektuaren baitan, eta irteera 9:00etan izango da. Ekimenak familiei, auzokideei eta naturaz gozatzea nahi duten herritar guztiei egiten die deia, ingurune hurbil, parte-hartzaile eta inklusibo batean.
Mendi-martxak Batala Mendi Lasterketarekin lotutako ibilbidearen zati bat ezagutzeko aukera emango du; proba ekainaren 27an egingo da Lazkaon. Horrela, parte-hartzaileek probaren ingurunea gertutik ezagutzeko eta paisaiaz elkarrekin gozatzeko aukera izango dute, adin eta erritmo ezberdinetara egokitutako jarduera baten bitartez.
Kirol eta mendizaletasun izaeraz gain, igandeko irteerak bizikidetza, lankidetza eta herritarren parte-hartzea balioan jarri nahi ditu. Ildo berean, ekimenak inklusioa, parte-hartze kolektiboa eta naturarekiko errespetua sustatu nahi ditu, eta euskara ere elkargune gisa kokatzen du.
Bestalde, gogorarazten da izen-emate epea zabalik jarraitzen duela ekainaren 27ko Batala Mendi Lasterketan parte hartzeko. Probak hiru modalitate izango ditu: 30 kilometroko mendiko lasterketa, 12 kilometroko mendiko sprinta eta 12 kilometroko mendi-martxa azken hori oinez egin nahi dutenentzat. Horregatik, interesa duten pertsona guztiei animatzen zaie izena ematera eta kirol hitzordu honetan parte hartzera.
Halaber, jakinarazten da lasterketarako boluntarioen plaza-kopurua dagoeneko bete dela. Zentzu horretan, eskerrak eman nahi zaizkie herritarrei erakutsitako prestutasunagatik eta inplikazioagatik, auzolan eta lankidetza gabe halako ekimenak aurrera eramatea ezinezkoa litzatekeelako.
Lazkaoko Udalak eta antolatzaileek igande honetako mendi martxan parte hartzera eta Batala proiektuarekin bat egiten jarraitzera gonbidatzen dituzte herritarrak, ekainaren 27ko lasterketako modalitateren batean izena emanez.
