Azaroko azken astea Lazkaora iritsiko da kirola, musika, umorea eta zinema uztartzen dituen agenda egitarauarekin.MOVEMBER egitasmoaren baitan bi ekintza nabarmenduko dira: “Busti zaitez!” kirol jarduera eta “Goierri MoHerri Comedy” umore gaua. Horrez gain, Kilometroak 2026ko aurkezpena izango da, Lazkaoko Musika Bandaren kontzertua eta asteburuan, zine‑emanaldiak eskainiko dira haur zein helduentzat.

Aste honetako lehen jarduera bihar ostegunean, azaroak 27 izango da. MOVEMBER kanpainaren esparruan ospatuko den “Busti zaitez!” ekimenak igeriketa erreleboak proposatzen ditu, 100 metroko txandak eginez, nahi duten pertsona guztientzat zabalik. Jarduera Joxemiel Barandiaran udal kiroldegian izango da, 19:00etan, eta gizonen osasun fisiko eta mentalari buruzko sentsibilizazioa du xede. Bertan jasotako dirua ikerketara bideratuko da. Ondoren, 20:00etan, Lazkaoko Musika Bandaren kontzertua izango da Areria Aretoan, sarrera doan izanik.

Azaroaren 28an, ostirala, Kilometroak 2026ko jaiaren aurkezpen ekitaldia egingo da. Hitzordua Plazako pilotalekuan izango da, 18:30ean, eta datorren urteko edizioaren xehetasun nagusiak aurkeztuko dira.

Azaroaren 29an, larunbatean, MOVEMBER ekimenaren jarduerekin jarraiki umore gau berezia izango da. “Goierri MoHerri Comedy” izeneko monologo saioa Areria Aretoan izango da, 19:00etan, eta parte hartuko dute Iñigo Salinero, artista sorpresa eta Kike Bigurik. Bertan jasotako dirua ikerketara bideratuko da. Giro alai eta kritikoaz gozatzeko aukera paregabea izango da.

Asteburuan, zinema izango da protagonista. “La Voz de Hind” pelikula, publiko helduarentzat zuzendua, Areria Aretoan proiektatuko da: ostiralean 21:00, larunbatean (22:00), igandean (19:30) eta astelehenean, abenduaren 1ean (19:00 eta 21:00). Bestalde, “Supercharlie” haur pelikula igandean, azaroaren 30ean, 17:00etan eskainiko da, familian gozatzeko aukera bikaina eskainiz.

Lazkaoko Udalak herritar guztiak gonbidatzen ditu kultur jarduera hauetan parte hartzera eta kulturaz herrian bertan gozatzera.


 BUSTI ZAITEZ MOVEMBER kartela

 

A28 Kilometroak 2026 aurkezpena

 

MONOLOGOAK MOVEMBER

 

lazkao musika banda

 

La voz de hind

 

super charlie