• Lazkaoko Udalak antolatuta, formakuntzak tresna praktikoak eskaini dizkie adingabeekin lan egiten duten profesionalei babeserako esparru-protokoloa ezartzeko, indarkeria saihestu, arrisku egoerak garaiz identifikatu eta modu egokian jarduteko, kirol, kultura eta aisialdiko testuinguruetan.

Lazkaoko Udalak haur eta nerabeentzako ingurune seguru, errespetuzko eta inklusiboak bermatzeko duen konpromiso irmoaren baitan, formakuntza jaso dute herriko kirol, kultura eta aisialdiko eragileek.

Saioaren ardatza Kiroleko, aisialdiko eta denbora libreko indarkeriaren aurrean adingabeak babesteko jarduteko esparru-protokoloa izan da; haurrei eragin diezaieketen indarkeria-egoerak saihestu, antzeman eta horiei aurre egiteko oinarri legal, instituzional eta etikoak jasotzen dituen tresna. Protokolo hau indarrean dagoen legedian oinarritzen da, eta udalek —Lazkaoko Udalak, kasu— funtsezko zeregina dute kirol, kultura eta aisialdiko instalazioetan espazio seguruak sortzeko.

Formakuntza hau protokoloan jasotako konpromisoetako bat izan da, eta, beraz, haren ezarpenaren lehen urrats gisa gauzatu da. Jardunaldian, parte-hartzaileek protokoloaren oinarri den lege-esparrua ezagutu dute, baita adingabeen babeserako beren rola aktiboki hartzeko beharra ere. Era berean, tratu txarren edo arrisku-egoeren edozein zantzuren aurrean prebentziorako, arriskuak garaiz identifikatzeko eta modu egokian jarduteko mekanismo eraginkorrak ezartzeko beharra landu da, bereziki adingabeekin jarduera fisiko, hezitzaile edo aisialdikoak egiten diren testuinguruetan.

Halaber, balioa eman zaio erakundeen barruan pertsona erreferenteek —hala nola babeserako arduradunek— betetzen duten funtzioari, barneko komunikazio-kanalak izatearen garrantziari eta, oro har, haurren eskubideak errespetatzen dituzten eta indarkeriarik gabeko espazioak eraikitzeko dugun erantzukizun partekatuari.

Protokoloak beste hainbat konpromiso jasotzen ditu, eta horiek pixkanaka betetzen joango dira. Hurrengo pausua arrisku-egoerak identifikatzea  izango da, udal eraikin eta adingabeek erabiltzen dituzten espazioetan ingurune seguru eta babesleak bermatzeko.