- Programa 2026ko ekainaren 27tik uztailaren 19ra egingo da, eta euskal diasporako gazteei aukera emango die Goierriko familietan bizitzeko, euskaran eta euskal kulturan murgiltzeko esperientzia paregabe batean.
- Gazte parte-hartzaileentzat eta harrera familientzat izena emateko epea zabalik dago jada, eta abenduaren 7an amaituko da.
Ateak Ireki programa 2026an itzuliko da laugarren aldiz, eta beste behin, Ipar Amerikako euskal gazteei aukera emango die hiru astez Goierrin egoteko, euskal kultura eta euskara gertutik ezagutzeko. Batzen Fundazioak antolatutako egonaldia ekainaren 27tik uztailaren 19ra izango da, eta izena emateko epea zabalik dago jada, bai gazteentzat bai harrera familientzat.
Aurten, programak berrikuntza garrantzitsuak izango ditu. Lehen aldiz, parte hartzaileen adin-tartea zabaldu da, eta orain Estatu Batuetatik eta Kanadatik etorritako 18 eta 25 urte bitarteko gazteek izango dute aukera Goierri eskualdeko euskal bizitzan, hizkuntzan eta kulturan hiru astez murgiltzeko.
Egonaldian, gazteak bertako familiekin biziko dira, gertuko eta familiarteko harrera eredu batean. Aste hauetan zehar, Maizpide barnetegian euskara eskolak jasoko dituzte, eta txangoak egingo dituzte Bizkaia, Nafarroa eta Iparraldeko hainbat tokitan. Horrez gain, bertsolaritza, gastronomia, herri kirolak eta pilota bezalako jarduera kulturaletan parte hartuko dute.
Ateak Ireki programaren helburua bikoitza da. Alde batetik, Euskal Herriaren eta diasporaren arteko lotura kulturala sendotzea du xede; eta bestetik, harrera familiei kultura-truke aberasgarri eta paregabe bat bizitzeko aukera eskaintzea. Goierriko eta inguruetako edozein familiak parte har dezake, izan guraso bakarrekoak, bikoteak edo pertsona bakarrak. Garrantzitsuena da ingurune segurua, abegitsua eta euskararen praktikarako egokia eskaintzea. Izena ematea online inprimaki baten bidez egiten da, eta prozesua elkarrizketa labur batekin osatzen da.
Bestalde, edizio honetako berrikuntzen artean, Ateak Irekiren aurreko edizioetan parte hartu duten familietako gazteek aukera izango dute udan Estatu Batuetan antolatzen den UDALEKU programan begirale gisa parte hartzeko. Esperientzia horri esker, euskal gazteek Atlantikoaren beste aldeko euskal komunitateak gertutik ezagutu ahal izango dituzte, eta lurraldeen arteko sarea ehuntzen jarraituko dute.
Programak hainbat erakunderen babesa jasotzen du, besteak beste, Eusko Jaurlaritza, Nafarroako Gobernua, Gipuzkoako eta Bizkaiko Foru Aldundiak eta Goieki, Goierriko garapen agentzia. 2024tik, gainera, Ateak Ireki NABO (North American Basque Organizations) federazioaren programa ofizialaren parte da.
Lazkaon informazio-saio bat antolatzea aurreikusita dago, programaren xehetasun guztiak herritarrei helarazteko. Data, lekua eta ordutegia laster jakinaraziko dira, interesa duten familiek zalantzak argitu eta harrera-esperientzia hau gertutik ezagutzeko aukera izan dezaten.
Ipar Amerikako gazteek izena emateko epea abenduaren 7ra arte egongo da zabalik, programaren webgune ofizialean: www.ateakireki.eus. Informazio gehiago edo zalantzak argitzeko, interesdunek Helbide elektroniko hau spam roboten kontra babestuta dago. JavaScript aktibatuta eduki behar duzu hau ikusteko. helbidera idatz dezakete.
