Lazkaoko Udalak joan den ostegunean, urriaren 30ean, egin zuen urriko ohiko osoko bilkura. Hartutako erabakien artean, bi aurrekontu-aldaketa onartzea nabarmentzen da, hainbat jarduera finantzatzea ahalbidetuko dutenak, hala nola Kultur Etxeko sarrerako atea berritzea, kirol-instalazioetan klimatizazio eta iragazte sistemak instalatzea, edo kanpoko igerilekuen ondoan lorategiak egokitzea besteak beste.

Era berean, Udalbatzak udal-eraikinak garbitzeko kontratu berria GUREAK Garbitasuna SLU enpresari esleitzea onartu zuen, 394.363,90 euroko zenbatekoarekin (BEZik gabe). Kontratu hau, gizarte-ekimeneko enplegu-zentro berezientzat eta laneratze-enpresentzat gordetako lizitazio-prozedura ireki baten emaitza da.

Arlo sozialean, baiezkoa eman zitzaion Gipuzkoako Foru Aldundiarekin etxez etxeko laguntza-zerbitzua finantzatzeko lankidetza-hitzarmenaren luzapenari, 2026ko irailaren 30era arte indarrean egongo dena.

Azkenik, erakunde-adierazpen bi eztabaidatu eta onartu ziren; bata, aho batez onartu zena, azaroaren 25ean ospatzen den Emakumeen aurkako Indarkeriaren Kontrako Nazioarteko Egunarekin lotuta, eta bestea, bizikidetzaren aldeko eta Ertzaintzaren zein udaltzaingoen aldeko adierazpena. Bigarren honetan, kidego horietako agenteek berriki jasandako erasoak gaitzetsi ziren, eta herritarren segurtasuna bermatzeko eta legezkotasun demokratikoa errespetatzeko egiten duten lana aldarrikatu zen,  EAJ-PNVren aldeko botoekin eta EH Bilduren kontrako botoarekin.

Azaroaren 25eko mozioa eta Euskal Poliziaren aldeko mozioa erantsi dira.