• 2026rako, zergak eta tasak, oro har, abuztura arteko KPIaren arabera eguneratuko dira, % 2,8ra iritsiz.
• Lazkaoko Udalak aho batez onartu ditu 2026rako Ordenantza Fiskalak, EAJ-PNV eta EH Bilduren babesarekin. Bi alderdiek adostutako neurriak zerbitzu publikoen jasangarritasun ekonomikoa bermatzea du helburu, jasotzen diren neurriek Lazkaoko Udalak herritarrei ematen dizkien zerbitzuen kalitatean eraginik izan gabe.

Lazkaoko Udalak 2026rako, zergak eta tasak, oro har, abuztua arteko KPIaren arabera eguneratuko ditu, %2,8ra iritsiz. 

Edateko uraren hornidurak eta hiri hondakinen kudeaketak % 5eko igoera izango dute, Sasietako Mankomunitateak proposatutako tarifen eguneratzearekin eta Europako araudia betetzearekin bat etorriz, Europako araudiak udalek zerbitzu horien kostu osoa, % 100, bere gain hartzea eskatzen baitu.

Gobernu taldeak EH Bildurekin lortutako akordioaren baitan, aipatutako %2,8ko eguneratzetik gorako igoerak aurreikusten dira hainbat zerbitzutan. Hala, kiroldegiko tarifek %12ko eguneratzea izango dute, inflazioak eta soldaten igoerek eragindako kostu operatiboen hazkundeari aurre egiteko. 

Bestalde, edateko uraren eta estolderiaren hornidurari dagokionez, tarifek %2,2ko igoera izango dute, zerbitzu horien kostuak estaltzeko.

Udal ordenantzek zerbitzu publikoak eskuratzeko ekitatea lehenesten dute. Horregatik, tasa murriztuak eta zergak ordaintzeko laguntzak mantenduko dira, Lanbidearteko Gutxieneko Soldatara egokituta. Laguntza hauek egoera ekonomiko ahulenean dauden familientzat dira, eta OHZ, ura, zaborrak, estolderia, kirol eta kultur jarduerak bezalako zergak eta tasak barne hartzen dituzte. Horrez gain, Gizarte Zerbitzuek kalteberatasun egoeran dauden pertsonentzako laguntzak eskaintzen jarraituko dute.

Kepa Zubiarrain alkateak adierazi duenez, “ordenantzak zuhurtasun, erantzukizun, eraginkortasun eta ekitate irizpideetan oinarrituta eguneratu dira. Inflazioaren eta ura, argia edo gasa bezalako oinarrizko horniduren garestitzearen testuinguruan, ezinbestekoa da zergak egokitzea, udal zerbitzuen mantenua eta hobekuntza bermatzeko”. Alkateak gaineratu duenez, “neurri hauen helburua herritar guztientzako udal zerbitzuen jasangarritasuna eta irisgarritasuna bermatzea da”.