• Bonuen salmenta maiatzaren 29an, 17:00etan, hasiko da plazan.
• Pertsona bakoitzak gehienez 3 merkataritza-bonu eskuratu ahal izango ditu.

Lazkaoko Udalak datorren maiatzaren 29an abiatuko du “Nik Lazkaon, zuk zergatik ez?” bonu kanpainaren 10. edizioa. Aurtengo edizioak bi ardatz nagusi izango ditu, berriz ere: bata tokiko merkataritzarako eta bestea herriko nekazaritza ekoizleentzako produktuen kontsumoa sustatzeko.

Bonuen salmenta maiatzaren 29an hasiko da, ostegunean, arratsaldeko 17:00etan plazan, eta gero Udaletxean jarraituko du, bulego ordutegian, bonuak agortu arte.

Merkataritzarako 2000 bonu jarriko dira salgai. Bonu bakoitza 30 eurotan eskuratu ahal izango da, eta 40 euroko balioa izango du, zortzi bonutan banatuta (8 x 5 €). Hiru bonu parte hartzen duten saltoki guztietan erabil daitezke, eta beste bostak elikagai-dendak izan ezik, gainerakoetan. Bonuak Udaletxean eskura daitezke bulego ordutegian, eta kanpaina ekainaren 20ra arte egongo da indarrean edo bonuak agortu arte.

Aurtengo berrikuntza nagusia pertsona bakoitzak gehienez hiru bonu erosi ahal izango dituela da, aurreko edizioetan bost ziren bitartean. Gainera, pertsona batek beste hiru pertsonaren izenean ere erosketak egin ahal izango ditu, NANak aurkeztuta. Neurri hau herritar gehiagorengana iristeko eta bonuak bidezkoago banatzeko helburuarekin hartu da, azken urteetan egun oso gutxitan agortzen zirela ikusita. Bonu hauek ekainaren 20ra bitarte egongo dira aktibo.

Bestalde, 200 bonu eskainiko dira nekazal ekoizleen produktuak erosteko, maiatzaren 29tik azaroaren 30era bitartean. Bonu hauek 20 eurotan eskuratu ahal izango dira, eta 35 euroko erosketa ahalmena eskainiko dute. Nekazarien bonuak ere Udaletxean egongo dira eskuragarri, eta ekoizle parte-hartzaileen produktuetarako izango dira baliagarri.

Kanpaina honen bidez, Lazkaoko Udalak tokiko ekonomia indartzeko eta herriko sektore estrategikoak —merkataritza eta nekazaritza— babesteko duen konpromisoa berresten du, herritarren ongizatea ardatz hartuta.