• Topaketak udalerriko merkataritza eta hiri diagnostikoa aurkezteko eta herritarren ekarpenak jasotzeko balioko du.

Datorren asteazkenean, martxoaren 12an, 13:15ean, Lazkaoko Udaletxeko Erakusketa Aretoak partaidetza jardunaldi bat hartuko du herriko merkataritzari eta herritar guztiei zuzenduta. Topaketa hau Udalak bultzatutako Tokiko Merkataritza Sustatzeko Planaren baitan kokatzen da. Plan hori iaztik garatu da, udalerriko merkataritza sarea indartzeko helburuarekin.

Saioan, azken hilabeteetan egindako merkataritza eta hiri diagnostikoaren emaitzak aurkeztuko dira, Lazkaoko eta inguruko merkataritzaren egoera sakon ezagutzeko. Gainera, merkataritza-sektorera bideratutako azterketa soziodemografiko bat azalduko da, eta joan den urrian kontsumo-ohiturei buruz egindako inkestaren ondorioak ezagutaraziko dira. Herritar askok parte hartu zuten inkesta horretan.

Udalak jardunaldi hau hausnarketarako eta eztabaidarako gunea izatea nahi du, merkatariek eta bizilagunek tokiko merkataritza bultzatzeko egin beharreko hurrengo urratsei buruzko ideiak eman ditzaten. Bertaratzea errazteko, bazkari txiki bat eskainiko zaie parte-hartzaileei.

Udalak herritarraktopaketa horretan aktiboki parte hartzeko gonbita luzatzen die. Topaketa honek, elkarrekin, tokiko merkataritza dinamikoagoa eta Lazkaoko beharretara egokitua eraikitzea du helburu.