• Erakundeak, biktimen eskubideen defentsarekin duen konpromisoa berresteaz gain, eginkizun aktiboa du prozesu judizialean, gertakariak zehatz-mehatz ikertuko direla eta erantzukizun guztiak argituko direla bermatzeko.

Lazkaoko Udalak iragarri du duela gutxi udal instalazioetan salatutako eraso matxistekin lotutako prozedura judizialean akusazio partikular gisa aurkezteko erabakia. Neurri horrekin, erakundeak biktimen eskubideen defentsarekin duen konpromisoa berresteaz gain, eginkizun aktiboa du prozesu judizialean, gertakariak zehatz-mehatz ikertu eta erantzukizun guztiak argituko direla bermatzeko.

Akusazio partikular gisa agertzeak islatzen du, halaber, erakundeak biktimen ondoan egoteko borondate irmoa duela justizia bilatzeko, bai eta sistema judizialari laguntzeko ere, gertakariak ahalik eta lasterren argitzeko.

Joan den igandean, azaroaren 24an, Udalak adierazpen instituzional bat argitaratu zuen, eraso horien salaketak gogor gaitzesteko. Komunikatu horretan, Udalbatzak bere eskumenen barruan lan egiteko konpromisoa berretsi zuen, indarkeria matxistarik gabeko bizitzak bermatzeko, errespetuaren, berdintasunaren eta bizikidetzaren printzipioen aurkako edozein ekintza gaitzetsiz.

Udalak biktimekiko eta haien familiekiko babesa eta hurbiltasuna berretsi du. Prozedura judizialean pertsonatzeko erabakiarekin, Lazkaoko Udalak indartu egin du indarkeria matxistaren aurrean duen tolerantzia eza eta gaitz sozial horren aurka modu aktibo eta irmoan borrokatzeko borondatea.